من اكتر من 6 سنين كدا على حسب ما اذكر كنت فى مول فى القاهره وكنت طالع اتغدى وكان معايا اصدقائى ومع حديثهم الممل وبين كل ترابيزات المطعم شدنى بنت وشاب تقريبا متجوزين من وقت قصير وكانت البنت باسدال مخليها جميله و الشاب ملتحى بلحيه صغيره وفى منتهى الشياكه اللى شدنى قوى ليهم ان البنت كانت زعلانه من جوزها وكانت بتبكى وبتبص لناحيه تانيه غير اللى جوزها قاعد فيها ،، والشاب قاعد بكل ما فيه عاوز يطيب بخاطرها عاوز يصالحها بيطبطب عليها بكل حنيه بيطيب خاطرها وهيا مش راضيه حسيت كتير انها بتدلل عليه يمكن يكون جارحها ويمكن يكون هو سبب بكاها ولكن هى عاوزه حبه عاوزه حنانه عليها وقعد المنوال كدا فتره لحد ما قاموا يمكن كنت اتمنى يفضلوا لحد ما اشوف نهاية ما يحدث امامى او يمكن حتى فكرت امشى وراهم علشان اعرف ازاى حينتهى الامر بينهم وفى الاخير رجعت لاصدقائى الخناشير اللى كنت معاهم ،،
بس وقتها ومع كل احوال بلدنا اللى كنت شايفها خربانه ومع كل الناس الوحشه اللى كانت الماده مسيطره عليهم ومع كل الظروف السيئه اللى كانت بتمر فى حياتنا لقيت الحب لقيته ولو بين اتنين حب بجد مش حب روايات بيكون اخره ضياع الاتنين حب نهايته احترام متبادل نهايه موده ورحمه نهايته سعاده نهايته اسره يحوط عليها سور ايمان بالله اسره تنجب ابناء يحملون عقيده صالحه يتربون فى جو ايمانى بيغلفه الحب ،،
وقتها بس عرفت ان الامل موجود طول ما الحب لسه باقى طول ما الناس لسه عارفه نوع من انواع المعانى النبيله طول ما فى ناس مش سيطر عليهم الماده فقط وجعلتهم عبيد عندهم وقتها تاكدت ان فى امل وان التغيير حيجى حتى لو بدا بتربيزه عليها اتنين متخانقين والحب اصلح بينهم ..
لـــــــــــ أحمــــــد خطابــــــى
